Tuesday, December 18, 2012

නන්නාඳුනන සිහිනය..

නිල් අහස නුඹ වගේ
උදෑසනම හිරු නැගෙන,
අවිහින්සක ඔය සිනාව
සිත්තම් කරාවි හිස් අහස...

ඉඟි පාන දඟකාරී නුඹ
කවියක් වෙලා මගේ හිත,
ගෙන ගිහින් අනන්තයට
මටත් හොරා හෙමිහිට....

සමනළියක් වගේ නුඹ,
නෙතු මානයේ පියඹද්දි,
හීනයක රඳවලා මං,
පැන ගිහින් නුඹ හනිකට...

සඳවතිය ලඟ ඉද්දි
තරු ගොන්නෙ නුඹ සෙව්වෙ,
සැඟවිලා ගිහින් නුඹ මගේ
නන්නාඳුනන
        සිහිනය වෙලා අද .....


Thursday, November 29, 2012

අන්සතු ප්‍රේමිය..

ඉඳුවර සැණකෙළි
කුමටද සොඳුරිය..
බඹසර පැවතුම්
බිඳලන සොබනිය..
තරු පිරි අහසක
දිදුලන කුමරිය...
නිදි නැති රෑ යම
කළඹන කලණිය..

දෙනුවන් රවටන
සොඳුරු රුවැත්තිය...
මුතුවන් දසනින්
සිනා දෙවන්නිය....
ගිනි ගෙන හදවත
දැවෙනා අරුමය...
හදවත ඉල්ලන
අන්සතු ප්‍රේමිය.......

Sunday, November 18, 2012

ප්‍රමිලා..

රජ සැප මොනවට,
නුඹ නැති යහන් ගැබ..
ප්‍රේමය නිසා නොවෙද,
බිසවුනි උනේ නුඹ අගබිසව...

මිණි මුතු නොවෙද,
නුඹෙ වත සරසන්නට....
පිරිවර ලඳුන් නැතිවද,
නුඹේ තනි නොතනියට....

නිරිඳුන් නිසා මම,
මදුර පුර කුල කුමරිය නුඹ,
නොවුනිද අද නුඹ,
සෙංකඩගල රජ කුමරිය...

රනින් බැඳි පියල්ලෙන්,
නුඹ පිදූනා නොවෙද,
සිරියහන අරා ගිය,
සුවඳ තවමත් මගෙ නේද...

කවිය නුඹ මා වෙන්කලාද,
කපුරු මලකට මම පෙම් කරාද,
සඳුන් දැව යහන මට අකෑපයිද,
දස්කොන්ට මිණි බැඳි දොර ඇරුනාද...?





Saturday, November 17, 2012

දස්කොන්..

පහන් තිර එළියෙන් වත්
නුඹේ රුව දකිනු රිසියෙන්,
පියමන් කලා මන්
බිසවුනි නුඹ දකින්නට..

රාජකීය සයනයේ,
රජුන් සනසන රුවැත්තී,
ලෙන්ගතු උනා මම හැමදාමත්
සංසාර පුරුද්දට...

තහනම් උනත් ප්‍රේමය,
බිසවුනි නුඹ උන්නෙ මන් ගාව,
මුතු වැස්සක් වගේ නුඹ,
කැළඹුවා මගෙ හද විලම...

අමාවක සකි සඳකි,
අපි අපේ ලඟින් උන්න,
සඳලුතල කෙළවරක,
අමරණීයයි අපේ ප්‍රේමය...

නුඹට පෙම් කල වරදට,
වදක මල් ගෙල රුවගෙන,
දංගෙඩියට හිස තියාන,
ප්‍රමිලා මම නුඹ සෙව්වා,
වදක බිම පුරාවට..........



Sunday, October 21, 2012

මළවුන්ගේ නගරය....

මළ සොහොන ඉවකර,
ආත්මය සොරාගෙන,
රෑ දොළහේ කනිසමට,
නුඹත් එක්ක නිදි වදින්න..
සොහොන් ගැබ හාරන්න,
බකුසු හූව ඇහෙන රෑක,
සඳ ගිලුනු අමාවකක,
උලලේනිගෙ විලපයට,
කීරි ගැහුන හිත අරගෙන...
මං එන්නම් සොඳුරියේ,
මළවුන්ගේ නගරයට...



Thursday, October 18, 2012

සුන්දරී.....

හදේ කොනක ඉපිද,
ඒ කොනෙහිම මියැදුන,
වලලන්නට ඉඩක් නැතිව,
ගිනි දල්වා දවා අළු කල,
මළ බතක් නොඋයාපු,
මළවුන්ටම කැපවුනු,
පුනරුප්පත්තියක් නොපතන,
සුන්දරී.....
නුඹයි මගේ ප්‍රථම ප්‍රේමය...


Tuesday, October 16, 2012

මගේ අවලං ආදරේ..

තරු ගොන්නේ දිළිසෙන,
පුංචිම පුංචි තාරකාවි,
දුරින් හිටියත් හැමදාම,
ඇයි නුඹට මං ,
මේ තරම්ටම ලෙන්ගතු?

නුඹ නොදන්න,
මම විතරක් දන්න,
නුඹේ සුවඳට පෙම් කරන,
ඒ ආදරේ හින්දද,
නුඹට මේ තරම් ලෙන්ගතු....

දිළී හිනැහෙන ඔය දෙනෙත් අග,
දැවී අළු වෙන මගේ හදවත,
මටත් හොරෙන් නුඹ ඉල්ලන,
ඒ ආදරේ හින්දමද,
මං මේ තරම් ලෙන්ගතු....

තරු පිරුනු හැම රෑක,
සයනයේ වැතිරගෙන,
දකින ෆැන්ටසි හීනෙ හින්දද
නුඹට මේ තරම්,
මම ලෙන්ගතු....

නෙලා නොගෙනම දෝතට,
සුවඳ විතරක් විඳින,
මගේ අවලං ආදරේ,
එපා කියන හින්ද වෙන්නැති,
මගේ හිත මේ තරම්ම,
නුඹට ලෙන්ගතු.....................


Friday, September 7, 2012

සයනයේ සිහිනය...

නුඹ ගිහින් දුර ගිහින්,
මට නොපෙනෙන්න නුඹ
සැඟව ගිහින්....
ආදරෙන් සිත පුරවලා මගෙ,
නොකියාම මට නුඹ ගිහින්...

අහිමි වෙලා අද නුඹෙ සුවඳ,
හිමිදිරිය සේ දැනුන..
හඬවලා මගෙ මුලු සිතම,
නුඹ ගිහින් දුර ගිහින්....

සිත්තමක් වගේ ඔය,
සිනාසුන සඳවතිය නුඹ
සිත් අහස කළුකරන් අද,
නොකියාම මට නුඹ ගිහින්....

සිඹින්නට මුව මඬළ,
ලබන්නට නුඹේ උනුහුම,
දු‍ටුව මගෙ සයනයේ සිහිනය,
බොඳකරන් අද නුඹ ගිහින්........

Sunday, September 2, 2012

මගේ ෆාතිමා...

නළලත කුංකුම තිලක තියන්,
මර‍තෝන්ඩිය රටා මවන්...
පෑල දොරෙන් ගෙට ගෙවදුන,
මගේ ෆාතිමා...

මොට්ටැක්කිලි තිරෙන් වසන්,
ඇඟිලි තුඩින් රටා මවන..
ලොවට හොරෙන් මගේම උනු,
මගේ ෆාතිමා...

තිරුංගල් ‍තෝඩු අරන්,
මං එනකොට දුරක ඉඳන්...
පැලලි දොරෙන් එබී බලන,
මගේ ෆාතිමා...

සිහින් හඬින් සිනා සෙමින්,
හුරතලේට තුරුළු වෙමින්..
රාමලාන් සඳට එබෙන,
මගේ ෆාතිමා...

Tuesday, August 14, 2012

කන්‍යාවිය...

අසම්මත හදුවෙන්
ගැබ්බරයි ඇය....
පහන් කණුව යට එළියෙන්
වීදි සරන සමනළිය ඇය....

සෙනෙහස නොවින්දත්
ගත සනසවන ඇය...
තරු පිරි අහසට
සුසුම් හෙලන ඇය...

සම්මත මිනිසුන්
තුරුලේ සනසන ඇය..
අසම්මත ලොකයේ
සුන්දර පෙම්වතිය ඇය...

ආදරය නොවින්දත්
විරහව විඳින ඇය...
නෙතු පිරුනු කඳුලු කැට
ලොවට හොරෙන් වියලන ඇය..

සම්මත මිනිසුන්ගේ
රතී දෙවඟන ඇය.....
අසම්මතයේ සොඳුරු මිනිසාට
කන්‍යාවියකි තවම ඇය...............


Friday, August 3, 2012

එකම එක ‍රැයක්

රාත්‍රිය නිහඬයි..
මතකයන් අමරණීයයි..
නුඹ හා ගෙවුනු එකම මොහොත,
හිතට හරි උනුහුමයි....

නිහඬවම දෙතොල් සිපගෙන,
උනුහුමට ගුලිව සැඟවුන,
ඉකිගසා හඬන නුඹ,
අහිමි බව නොදැනුනා මට....

නිදි යහන පුරාවට,
අහිමිවුනු නුඹේ සුවඳ,
තරු පිරුනු අහස යට,
විසිරිලා හැමතැනම...............

අපි අපේ නොවන බව,
නොදැන අපි ලං වෙලා..
රත්‍රිය පුරාවට
සොඳුරු සිහිනෙක මම දැව‍ටුනා...

සැඟවිලා මේ සම්මතයෙන්,
අසම්මත උනා නම් මොහොතකට
එකම එක ‍රැයක්,
නුඹත් මමත්............................

Sunday, July 1, 2012

හැන්දෑව...

නුඹේ දෑත පටලාගෙන,
ගං ඉවුර කෙළවරක,
ඇවිද ගිය හැන්දෑව,
සොඳුරුයිද මොනතරම්....

මන්දාරම් වැහි පොදට,
හමා එන සීතල සුලඟට,
තෙමුනු නුඹේ සියොළඟ,
සොඳුරුයිද මොනතරම්....

වැහි බිඳු සිපගත්ත,
නුඹේ සිනිදු දෙකොපුල්,
සිහින් දෙතොල් පෙති,
සොඳුරුයිද මොනතරම්....

සීතලට ගැහෙන,
ඇඟිලි තුඩු සිපගෙන,
මගේ උනුහුමට ගුලි උන,
හාදු වැස්සෙන් මා තෙමාපු,
ඒ මන්දාරම් හැන්දෑව,
සොඳුරුයිද මොනතරම්....


Wednesday, June 13, 2012

හීන අරන් ආයෙමත්

සුදු අතින් අල්ලගෙන,
හිමිදිරියේ පිනි වැ‍ටුනු,
ගුරු පාර කෙළවරක,
ඇවිදයන්න ආයෙමත්....

වෙල් එලියේ මඳ සුලඟට,
දඟ කරන නුඹේ කෙහෙ‍රැලි,
වසාගත්  නුඹේ දෙකොපුල්,
සිපගන්න ආයෙමත්....

උරතලයේ හිස හොවාන,
සුවෙන් නිදන නුඹ දිහා,
ඇසිපිය නොහෙලා නෙත්,
බලන් ඉන්න ආයෙමත්....

හීනෙනුත් හිත ඉල්ලන,
හිත පුරා දඟ කරන,
නුඹේ පිරුනු ආදරය,
විඳගන්න ආයෙමත්.....

මං එන්නද හෙට උදේම,
හීන අරන් ආයෙමත්............

Friday, June 8, 2012

පළමු හාදුව..

අදරෙන් මං දුන්න,
පළමු හාදුව නුඹට,
අමතක වෙන්නෙ කොහොමද,
නුඹ නැති උනාට
අද මගේ ලඟ....

හදවතින් ගැහි ගැහී
නළල් තලය සිපගත්තෙ මං,
අද වගේ දවසක
නුඹට මතකද?

සීතලට මිදුනු,
මගේ දෙතොලග
උණුසුම් කලා මොහොතකට,
ආදරේ පුරෝගෙන,
නුඹට මතකද?

තරු එක්කත් හිනා උනු
නුඹේ ඔය දෙනෙත් යුග,
කියාදුන්න මට ආදරේ ගැන..
මට වගේ අද නුඹට මතකද?

Monday, May 28, 2012

පිපුනු මලක...


සදුත් නොමැති
තරු පිරි නැති
ඉර අවරට
ගියපු දිනෙක...

හෙලපු සුසුම්
වැටුනු කදුලු
මුතු අමුනා
ඉවර දිනෙක...

සිහින රැයක
නුඹේ සිනහා
රූ මානෙක
මැවෙන දිනෙක...

පිපුනු මලක
වැහි බිදුවක
ගී තනුවක්‌
වැයෙන දිනෙක...

යලි හමුවෙමු
ඉස්‌සර වගේ
පන්ති ගියපු
ශනිදාවක...

Wednesday, May 23, 2012

නුඹ කොහිද...


දහසක්‌ පෙරුම් පුරන්
හිත මිතුරු ආදරේත් අරන්
සිහින ඔක්‌කොම වෙනස්‌ කරන්
පෝරු නැග්ගා අපි!...

කොහේදෝ දුර ගිහින්
ආදරයක්‌ නෑ හිතේ
වෛරයක්‌ වත් නෑ මගේ
නුඹ කොහිද කොතැනද
හොදින් ඉන්නවද කොහේ.....

අපරාදේ ජිවිතේ
අපිට අපි හමුවුනේ
වරද කාගේද ඔබේද මගේ
නෑ අපේ දෛවයේ.......


Tuesday, May 22, 2012

සිප ගන්න එක වරක්...

බලන්න මොහොතකට,
නැවතී එක් වරක්,
ගෙවීගිය අතීතයෙන්,
දෙන්න මට බිඳුවක්.....

හිනැහිලා නෙතුසලා,
සිප ගන්න එක වරක්,
රඳවන්න දෙතොලඟ,
නලලත මොහොතක්....

තුරුළු වෙලා ඉකිබිඳින්න,
දෙන්න මට මොහොතක්,
උණුහුමට ගුලි වෙලා,
‍රැ‍ඳෙන්න තව මොහොතක්....

ගිලිහුනු අතීතයට,
යන්න  බෑ දැන් ආයෙත්,
නුඹේ සෙනෙහස ලඟ,
ගොළු වෙලා මං තාමත්.........

෴ ලොක්කයියා ෴

Tuesday, May 15, 2012

හංසියේ....

ආදරණීය හංසියේ....

මගෙ හිත ආදරෙන් පුරෝපු,
හිමිදිරියට වඩා සොඳුරු,
ඔය සුදු මූහුනට හාදුවක් දෙන්න,
හිතෙනවා මට,
මේ දැන්ම දුවං එන්න..

පෙති දෙපෙති විහිදාන,
පිපුනු මල්ගොමු  පරදන,
නුඹේ ඔය සිනහ මල්,
සුන්දරයි පෙරසේම....

අතීතයේ දොඩමලු උනු,
නුඹේ විසල් දෙනෙත් යුග,
යළි දකින්නට හැන්දෑවක,
පෙරුම් පුරනවා මං හැමදාම...

අහස තරම් දුරින් ඉන්න,
නුඹට මම පොළොව උනාට,
හංස ගීතයේ තනු වයන්න,
තහනමක් ඇත්ද,
මේ සොඳුරු සිතට...

෴ ලොක්කයියා ෴

Tuesday, May 8, 2012

මායාව..

අදහගන්නත් බෑ මට,
මේ දකින්නේ මායාවක් ද,
බොඳවුනු සිහින්යක්ද,

අතීතය සිත්තමක් කෙරු,
මගේ සිහින සිත්තරාවිය,
හිමිදිරිය පරදන,
සිනා මුව සඟවාගෙන,
පුංචි සිඟිත්තියක,
ළැමට තුරුලු කරගෙන,
විසල් යුග නෙතු,
බොඳ කරන් අද,
පිය මැන්නා බෝ මලුව,
දිහාවට...

නැවතුනා මොහොතකට,
හමුවුනා දෙනෙත් යුග,
පෙරදා වගේමයි,
ඒ සුවඳ දැනුනා මට...

දොඩමලු වුනු අපේ සිත්
වෙන්වුනා මොහොතකට,
නොකියූ කතාවක්,
හදවතේම සඟවගෙන...

ප/ලි .................................

අපිට අපි අහිමි වුන,
ලෝකයේ දෙතැනක,
නුඹ මෙන්ම මමත්,
සිහින දකිනවා තවමත්...

෴ ලොක්කයියා ෴

Friday, May 4, 2012

නැවතුනා සිත.

නැවතුනා සිත, සොඳුරු දනවුවක..
ගෙනගියා සිත, අනන්තය වෙත..
බිඳුනු බඹසර පසෙකලා මම,
දැහැන් පිරුවා නිවන් දක්නට...

පෙරුම් පුරාගෙන, නුඹේම වන්නට,
නොදැමුනු සිතින් පෙම් කලා මම...
විරහව දුකක් නොවේයැයි නොදැනුනා මට,
හැර ගියදා නුඹ මගේ පෙම...

නෙලුම් මල් මිටක් ගෙන,
බුදු පුදට පියමැන්න මට,
වැටහුනා මේ සියල්ල,
මොහොතකින් නැසෙනසුලු බව..

දිගු කෙහෙ‍රැල් සිඳලා මම,
කසාවතක් ගත රුවාගෙන,
සසර කතරෙන් එතෙර වන්නට,
පාරමී දම් පුරමි අද දින,
මෙහෙණියක වී සඳුන් සෙවනක...

෴ ලොක්කයියා ෴

Saturday, April 28, 2012

රාත්‍රිය තවම තරුණයි..

රාත්‍රිය තවම තරුණයි,
උණුහුමට ඇය තුරුලු වෙයි,
මෙය අලුත් ආරම්භයක් ද?
මෙය අලුත් ජීවිතයක් ද?
එනමුදු සිත තවම,
නුඹ සොයයි..........

කාලය සෙමෙන් ගෙවීයයි,
අලුත් සිහින මහ ගොඩයි,
ඇය නම් පෙරදා වගේමයි,
ආදරෙන් මට තුරුලු වෙයි,
එනමුදු තවමත්,
නුඹේ මතකය එහෙමමයි......

සිතිජඉම හරිම සොඳුරුයි,
අපෙ අතීතය වගෙයි,
මතකය බොහොම දුරයයි,
ජීවිතය අද නැවතිලා වගෙයි,
එනමුදු මං ඇයට,
මහ ගොඩක් ආදරෙයි..........

෴ ලොක්කයියා ෴

Thursday, April 26, 2012

කින්නරාවියේ නුඹ...

කින්නරාවියේ නුඹ,
ගිනි වැද්දුවා මුලු හිතම,
සරාගී දෙනෙතින්,
හිනැහිලා මට....

‍රැයම මගෙ සොරා ගෙන,
හීන ඔක්කොම ගුලි කරන් නුඹ,
වැතිරුනා මගෙ සයනයේ,
උණුහුමින් මා වෙලාගෙන...

සෙවනැල්ලටත් නොකියාම,
පියමැන්න කින්නරාවි නුඹ,
නිතඹ නළවන අපුරුවට,
පෙම් කලා මං හැමදාම....

තරු ගොන්නට සඳක් වුනු,
කින්නරාවි මගේ නුඹ,
හදවතට තුරුලු කරන් මම,
දකිනවා තවම ඒ කින්නර සිහිනය...

෴ ලොක්කයියා ෴

Tuesday, April 24, 2012

ඕලු මලක් තැනුවා...

කිරි කොතලෙට ගොම වැ‍ටුනට,
කොතලෙන් කිරි බිව්වා...
පැණි මත කුහුඹුවො වැසුවට,
පැණි වල රස බැලුවා...
පිපාසයට කර දියරෙන්,
අමා පැනක් සැදුවා....
පෙති විසිරුණු සියපතකින්,
ඕලු මලක් තැනුවා.......

ඉර ගොරවා සඳ ගොරවා,
මට කලුවර කෙරුවා...
කලු දිය පොකුණක පතුලේ,
මට යහනක් තැනුනා...
මම හදාපු ඕලු මලෙන්,
මට සුවඳක් දැනුනා...
නෙලුම් මලක ‍රැදුන සුවඳ,
ඕලු මලෙත් තිබුනා....


Friday, April 20, 2012

ඔයත් එක්කම..

මහමෙරක් තරම් ආදරේ කරලා,
එකට ගුලි වෙලා ජීවිතේ බෙදාගෙන,
වෙන් වෙලා යනකොට දුක තමයි,
ඒත් මොනව කරන්නද,
අපි අපිට ආදරේ කරාට,
කවදාවත්ම එක් වෙන්න බැරි තරමටම,
බාධක පිරිලා....

ඔයාට අයිතිවාසිකම් කියන්න,
තව කෙනෙක් ඉන්න කොට,
දෙමව්පියන්ට රිදවන්නෙ කොහොමද මං,
එයාලට හොරෙන් ඔයාව ගෙනිහින්,
එතකොට මටත් දුකයි,
ඔයා දුක් විඳිනකොට....

ඔයාටත් ඕන උනේ මට ආදරේ කරන්න,
හැබැයි එයාගෙ වෙලා දුරින් ඉඳගෙන,
මට ඕන උනේ ඔයාව මගේම කරගන්න,
හැමදාම ලඟින් ඉඳන් ආදරේ කරන්න,
උණුහුමට තුරුලුවෙලා කතන්දර කියන්න,
වැස්සට තෙමිලා අව්වට වේලෙන්න,
හැබැයි ඔයත් එක්කම.....

බෝල බෝල අකුරු වලට ආදරේ පුරෝලා,
සිය ගනන් ලියුම් ලියපු අපි,
අද දෙපැත්තකට වෙලා කඳුලු පුරවන්,
ආදරේ ගැන කතා කරනව...
ඇත්තටම අපි,
ආදරේ කරා කලින් වැඩිද?


෴ ලොක්කයියා ෴





Monday, April 16, 2012

කඩුපුල් මලක්..

කඩුපුල් මලක්,
පිපිලා මුලු රෑ පුරාම,
නිදි යහන පාලුනෑ,
මල් සුවඳ හැම තැනම....

රාත්‍රිය විතරක්ද,
අපි අපිට උරුම,
ඇසුවා ඇය මගෙන්,
දෙනෙත් අඟ කඳුලු පුරෝගෙන...

මගේ වේ නම් ඇය සදහට,
නොවැටේවි ඔය කඳුලු කැට,
ඇය තවමත් අයිති ඔහුටමයි,
අසම්මතයි මගේ පෙම.....

෴ ලොක්කයියා ෴

Friday, April 13, 2012

සුභ නව වසරක් වේවා!....

කිරියෙන් පැණියෙන් ඉතිරෙන සුභම සුභ නව වසරක් වේවා!....


Wednesday, April 11, 2012

නුඹේ ඒ මිහිරියාව.

සීතල හිරි පොද,
නුඹේ වත සිප ගනිද්දී,
නිහඬවම බලා සිටියා මම,
නුඹේ සුවඳ විඳගන්න..

ගෙවී ගිය සුලු මොහොත,
කල්පයක් සේ දැනුනි මට,
නුඹේ සරාගී දෙනෙත් හමුවේ,
මට මාද අමතක විය...

වෙන් උනද අප එකිනෙකාගෙන්,
දෙනෙයි තවම මට,
මා උණුසුම් කල,
නුඹේ ඒ මිහිරියාව....

෴ ලොක්කයියා ෴

Books

මේ ටිකේම මුකුත් ලියන්න බැරි උනා, මේකෙන් ටිකක් ඈත් වෙලා මට හම්බවුන පුරාවිද්‍යත්මක ප්‍රබන්ධ පොත් 3 ක් කියෙව්වා.  "මායාව (The Deception)", "රාජ උරුමය (The Legacy)", "රාවනා මෙහෙයුම". මේ පොත් නිසා මට දෙන් පුරවිද්‍යව ඉගන ගන්න හිතිල තියෙන්නේ.

පුලුවන් උන වෙලාවක මේ පොත් කියවල බලන්න.



Friday, April 6, 2012

මටම හීනයක් වෙලා....

දු‍ටුව මං සිහිනයක්
රාත්‍රිය පුරාවට,
නුඹ හිටිය, මං හිටිය,
අපිට අහිමි වර්ථමානෙක....

නටබුන්ව ගිය අතීතයෙ,
හෙවනැලිත් දැන් මැකිලා,
ගෙවපු ඒ සොඳුරු මොහොත,
හීනයකම වෙලා.....

නුඹ දිහා බලන් මං,
ලිව්ව කවි සේරම,
කඳුලු වලටම බොඳ වෙලා,
නුඹ නැතුව මගෙ ජීවිතේ,
මටම හීනයක් වෙලා...........

෴ ලොක්කයියා ෴

Thursday, April 5, 2012

හඬන්නෑ මං තනියම..

සඳ ලඟ තියන්,
තරුවකට පෙම් කරල.
විඳවන්නෙ මං,
මේ ජීවිතේ....

ඈ හින්ද මං,
වින්දෙ මෙපමන දුක්,
දුන්නු හින්ද වෙන්නැති,
නුඹට කප්පරක් ගිනි....

පාලුවට ගිහින්,
මගේ සිහින ඔක්කොම,
නුඹ සිටිය නම් දැන්,
හඬන්නෑ මං තනියම...

෴ ලොක්කයියා ෴

Wednesday, April 4, 2012

ආලවන්ත නුඹ..

ආලවන්ත නුඹේ,
හිත රිදවනු නොහැකියෙන්,
මළානික දෙනෙත් අඟ,
කඳුලු දකිනට නොහැකියෙන්,
යන්න ගියා මං,
නොදොඩම,
නොහඬාම,
ආපසු නොහැරීම,
පැතුවා මං හදවතින්ම,
මෙවන් දිනක්,
යළි නොඑන්නට,
නුඹේ දිවියට ......


෴ ලොක්කයියා ෴

Tuesday, April 3, 2012

නුඹේම වන්නට..

හිත හිරිවට්ටන 
ඔය නෙතු සඟලට
පෙම් කෙරුවා මං හැමදාමත්...

නුඹේම වන්නට
හුරතල් වන්නට 
පෙරුම් පිරුවා මං හැමදාමත්...

නුඹේම නෙතඟින් 
දුරස් කරන විට
හැඬුවා හිත මගෙ හැමදාමත්...

වෙනකෙකු අතගෙන 
දිවි දුර යද්දිත්
හිත ඉල්ලුවේ නුඹ හැමදාමත්...

නුඹ නෑ මගේ ලඟ.

පැතුම් ගොඩක් හද පුරෝගෙන,
පියුම් හතක් දෝත දරාගෙන,
මතකද අපි පිය මැන්නා,
බුදු සාදු වඳින්නට.....

මල් පහන් පුද කර,
පැතුවා ලඟින් ඉන්නට,
හැමදාමත් මුලු සංසාරෙම,
උපදින හැම භවේදිම...

බෝ මලුව පාලුයි,
පැතුම් පොදි එහෙමමයි,
හැබැයි මං අද තනියෙන්,
නුඹ නම් නෑ මගේ ලඟ.....

෴ ලොක්කයියා ෴

Monday, April 2, 2012

හිතුවක්කාර මං

හිතුවක්කාර මං..
රිදෙව්ව හොඳටෝම,
නුඹේ පුන්චි හිත..

මුවැත්තියක් වුනු නුඹ..
විසල් යුගනෙතින්,
බලා සිටියා මදෙස..

ඳුක හිතුනා මටත්.. ඒත්,
පමා වැඩියි හොඳටෝම,
නුඹ අයිති නෑ දැන්,
මගේ ලෝකෙට..


෴ ලොක්කයියා ෴

Sunday, April 1, 2012

මං මෙතන මියැදිලා...


නුඹ හින්ද මං දැක්ක,
හීන ඔක්කොම බොඳ වෙලා..
නුඹ කියූ වදන් වලට,
මගේ හිත ගල් වෙලා....

අඬන්නට කඳුලු නැතුවම,
මගේ නෙතුයුග වේලිලා....
ලියූ සිය දහස් කවි එක්ක,
මගේ හිත දැන් තනිවෙලා....

මල් පිපුනු  වසන්තයම,
ඉඩෝරයකට අද අහුවෙලා..
නුඹ දුන්නු දුක එක්ක,
මං මෙතන මියැදිලා.....


෴ ලොක්කයියා ෴

මගෙ සිහිනය

ඔසරි පොටින්, මාල හතෙන්,
නුඹ හැඩ වෙද්දී...
පාවඩ එලා, උඩුවියන් බැඳ,
මඟුල් බෙර වැයෙද්දී..
කෙන්ඩියෙන් පැන් දොවා,
රන් හුයෙන් ඳෑගිලි පැටලෙද්දී...
බුලත් හුරුල්ලෙන්, ජය මඟුලෙන්
ආසිරි ගී ගැයෙද්දී...
නුඹේ අතගෙන, පොරු මත හිඳ
හිනැහෙමින් ඔහු මදෙස බලදී......
මළ බෙර වැයුනා මගෙ සිහිනයට
නුඹ අද පිටගම් යද්දී.......

෴ ලොක්කයියා ෴


Friday, March 30, 2012

මං තවම ආදරෙයි..

හැර යන්න වුනේ නුඹ,
හදවතින් නම් නොවෙයි,
දරාගන්න බැරි නිසයි..
ඳුක දැනෙනවා වැඩි නිසයි..

අහිමි වුන නුඹයි,
නුඹේ ඔය හුරතලයයි...
දකින විට ලෝබයි..
ඳුකින් මගෙ හිත හඬයි...

පෙරදා වගේමයි,
දැනෙන්නෙත් ඒ සුවඳමයි..
සිප ගන්න ආසයි....
අහිමි වුන නුඹට,
මං තවම ආදරෙයි........

෴ ලොක්කයියා ෴

Friday, March 23, 2012

අහස සේ නුඹ....



නුඹේ නෙතු දෙස
බලා හිඳිනෙමි..
ඈත දුරකට
සිත දුවයි....
අහස සේ නුඹ
පොළොව සේ මම...
දෑස් තුල මට පෙනේ...

නුඹේ නෙතු දෙස
බලා හිඳිනෙමි...
මගේ නෙතු
කඳුළින් පිරේ...
දොඩන වදනින්
නොකිව්වත් මා...
සදා නුඹටයි ආදරේ....

නුඹ..

අවදි උනු අතීතය..
වද දෙමින් මතකයට..
නුඹව සෙව්වා,
දහසකුත් අපේ සොඳුරු,
සිතිවිලි මැද..

දඟකාර නුඹේ..
දෑත පටලගෙන..
අවිද ගිය සයුරු තෙර..
පලුයි අද.. නුඹත් නෑ.. මාත් නෑ...
පිය සටහනුත් මැකිලා....

සුලඟට විසිරුනු..
දඟකාර කෙහෙ‍රැලි..
සිප ගන්නට වෙර දැරු,
නුඹේ ඔය දෙතොල් පෙති..
අද නෑ මගේ ලඟ..
නුඹ මගෙන් වෙන් වෙලා........

අහිමි මනාලි..

රාත්‍රිය නිමාවී.. උදැසන හිරු නැගෙද්දී...
ඇයත් එක්ක මම සිටියා, දෑත් පටලාගෙන...
මේ ගෙවෙන්නේ සොඳුරු සිහිනයක..,
අවසන් හෝරාවදැයි,
ඇයට තුරුල්වී.. ඇගේ කනට කොඳුරමින්...

අහිමි උනු අතීතයත්... නොලැබෙන අනාගතයත්,
යලි නොයෙන මේ ‍රැයත්...
මතකයට එක් කර.... හැරයන්න සිහිනයෙන්..
යලිත් දකින්නට අවසර නැති මට..
මගේ අහිමි මනාලියේ...


෴ ලොක්කයියා ෴

Tuesday, March 6, 2012

Love

මෙහෙම කියන දේ ඇත්තමයි කියලා මටත් හිතෙනවා. අපි ජිවිතේ පුරාවටම අදරේ කරනවා. එත් හෙමදාම ලඟින් ඉන්නෙ කීයෙන් කීදෙනද...

Tuesday, February 21, 2012

සිත්තරාවිය..

සීතලට පිනි වැටෙන,
රාත්‍රිය පුරාවට....
සඳ එලියෙන් නැහැවුන,
සිනිඳු සියොලඟ,
සිප ගෙන මොහොතකට,
බලාසිටියා මම..
මගේ සිහිනය සිත්තමට නැගු,
සිත්තරාවිය දෙස.........

Sunday, February 19, 2012

Day - 02

ඔන්න මගෙ දෙවනි දවස. නිවාඩුවක් හම්බ වෙනවා කියන්නෙ නම් ඉතින් හීනයක්. හිතන්නවත් වෙලාවක් නැති මට සමහර වෙලාවට මෙහෙමත් හිතෙනව.....

ඔබ නැතුව ඉන්න බැරි තරමට,
ඔබ හිතට ඇවිත් හෙමි හෙමිහිට.....
ඔබ නොදැක ඉන්න බැරි තරමට,
 සිත ඔබව සොයනව දවසෙම...

Sunday, February 12, 2012

Day - 01

ඔන්න ඉතින් මාත් බ්ලොග් එකක් ලියන්න හිතුවා.. මෙක හිතුව තරම් අමාරුත් නැ වගේ.

ලොක්කයියා කිව්වම ඔයාල හිතයි චන්ඩියෙක් කියලා, එත් මම චන්ඩියෙක් නෙමෙයි ශේප් එකේ ඉන්න සිම්පල් කොල්ලෙක්. ආදරේට "ලොකූ" කියලත් කියනවා. ඉතින් මම හිතගෙන ඉන්නෙ මට දෙනෙන හිතෙන දේවල් මේකෙ ලියන්න, හෙම දෙයක් ගෙනම. ඔගොල්ලන්ටත් හිතෙන දෙවල් මට කියන්න.. අපේ අත්දැකීම් තවකෙනෙක්ගෙ ජීවිතේට ගොඩක් උදව් වෙයි කියල මට හිතෙනවා.